Թումոյի ծրագրավորողների թիմը եւ աշխատանքային առօրյան՝ ներսից
Թումո ասելիս շատերը միայն կրթական բովանդակություն են պատկերացնում, բայց դրա կուլիսներում աշխատում է ծրագրային ապահովման ինժեներների (software engineer) մի ամբողջ թիմ, որի միջոցով այդ բովանդակությունը մատուցվում է ուսանողներին:
Ի տարբերություն շատ այլ ծրագրավորողների, որոնք չեն տեսնում իրենց մշակած պրոդուկտն օգտագործողներին, Թումո կենտրոնի software engineer-ների թիմն ամեն օր հնարավորություն ունի տեսնելու իր գրած ծրագիրը սպառող հարյուրավոր ուսանողների:
«Մենք հնարավորություն ունենք ամեն պահի մոտենալու, զրուցելու ուսանողների հետ, հասկանալու՝ ինչից են դժվարանում, մտածելու՝ ինչը փոխենք»,- Երեւանի Թումո կենտրոնի software engineer-ների աշխատասենյակ մեզ ուղեկցելիս ասում է ծրագրային ապահովման ինժեներ Գարեգին Դավթյանը:
Itel.am-ի հետ զրույցում Գարեգինը պատմել է Թումոյի ծրագրավորողների աշխատանքային առօրյայի այս եւ այլ առանձնահատկությունների, նրանց ստեղծած պրոդուկտների եւ իրականացրած միջազգային նախագծերի մասին:
TUMO Engineering թիմը
Թումոն կրթական կենտրոն է. հաճախ թյուր տպավորություն է ստեղծվում, թե այստեղ միայն դասավանդողներ են աշխատում: Այնինչ, կրթական բովանդակությունը հնարավորինս արդյունավետ ուսանողներին հասցնելու համար, աշխատում է ծրագրավորողների մի ամբողջ թիմ:
[[gallery1]]
Հայաստանի եւ միջազգային կենտրոնների համար Թումոյի կրթական ծրագիրը կոդավորող թիմը բաղկացած է ծրագրային ապահովման ինժեներներից, դիզայներներից, օգտատերերին աջակցություն ցուցաբերողներից, որակի ապահովման (QA) մասնագետներից, որոնց միջոցով ստուգում, թեստավորում ենք մեր գրած ծրագրերը:
Բոլորս որպես մի թիմ մշակում ենք այն հիմնական համակարգը, որի միջոցով ուսանողները կարողանում են հնարավորինս հարմար ստանալ կրթական բովանդակությունը:
Աշխատանքը
Թումոյի ծրագրավորողների աշխատանքի հետաքրքրությունն ու մոտիվացիան այն գիտակցումն է, որ մեր ծրագրավորած համակարգը նպաստում է, որպեսզի ուսանողներն ավելի արդյունավետ կրթություն ստանան: Մեր աշխատանքային մյուս մոտիվացիան էլ այն է, որ կարող ենք շփվել հարյուրավոր ուսանողների հետ, որոնք օգտվում են մեր մշակած ծրագրից:
Մեր թիմը կոնկրետ ծրագրեր գրելու առաջադրանքներ ստանալուց բացի՝ հենց սկզբից մասնակցում է դրանց մշակմանը, քննարկմանը, հնարավորություն է ունենում առաջարկել լուծումներ, որոնք ավելի կբարելավեն կրթական պրոցեսը:
Կրթական ծրագիրը եւ Շավիղը
Կրթությունը Թումոյում երկու ուղղությամբ է ընթանում, ինքնակրթություն, որի ընթացքում ուսանողները վարժանքների միջոցով ինքնուրույն ծանոթանում են տեխնոլոգիաների եւ դիզայնի կրթական 14 ոլորտներին, եւ դասընթացներ, որոնց ժամանակ դասընթացավարների օգնությամբ ուսանողներն արդեն կոնկրետ ոլորտում ավելի խորը գիտելիքներ են ձեռք բերում:
Ինքնակրթությունը կազմակերպվում է վարժանքների միջոցով: Այսինքն՝ ուսանողները կատարում են վարժանքներ, ծանոթանում են կրթական որեւէ բովանդակության հետ, վերջում հարցերի պատասխանում կամ առաջադրանք կատարում, եւ դրանց միջոցով համակարգը փորձում է հասկանալ, արդյոք հասկացե՞լ է ուսանողը նյութը, թե՞ ոչ: Ինքնակրթության այս պրոցեսը նաեւ անվանում ենք կողմնորոշման փուլ, որի ընթացքում ուսանողները փորձում են հասկանալ, թե առաջարկվող ոլորտներից որոնք են իրենց հետաքրքիր:
[[gallery2]]
Կողմնորոշման փուլը 2-3 ամիս անցնելուց հետո ուսանողներն անցնում են հաջորդ փուլ, որը կոչվում է Շավիղ: Այս փուլում ուսանողներն արդեն որոշակի պատկերացում են ունենում տարբեր ոլորտներից եւ նրանց առաջարկում են ընտրել 14-ից 6-ը՝ ավելի խորը գիտելիքներ ստանալու համար:
Այնուհետեւ, Շավիղը, հաշվի առնելով այդ ընտրությունը, հասանելի դասընթացները, առաջարկում է ուսանողին կրթական ուղի շուրջ մեկ տարվա համար: Շավիղը ներկայացնում է նաեւ այն նախապայմանները, որոնք պետք է կատարել դասընթացին մասնակցելու համար:
Կախված ուսանողի առաջընթացից, նախընտրություններից՝ Շավիղն ադապտացվում է: Այսինքն` հենց այն պահին, երբ Շավիղ համակարգը տեսնում է, որ ուսանողի տվյալ պահի առաջընթացին համապատասխան ավելի լավ ուղի կա, նրան առաջարկում է փոխել իր ուղին՝ որի շնորհիվ ուսանողը կկարողանա իր նախընտրություններն ավելի կարճ ժամանակահատվածում հաղթահարել կամ ավելի շատ բան սովորել:
Շավիղը մենք համարում ենք մեր հիմնական պրոդուկտը, որի միջոցով Թումոյի կրթական բովանդակությունը հասնում է ուսանողին:
Պրոդուկտները եւ նոր պահանջները
TUMO Engineering թիմը ժամանակ առ ժամանակ այլ պրոդուկտներ մշակելու վրա է աշխատում, որոնց ստեղծման անհրաժեշտությունը բխում է տվյալ իրավիճակից:
Թումոյի կրթական համակարգն անընդհատ մշակվող գործընթաց է: Ամեն մի նոր բացվող կենտրոնի հետ գալիս են նոր պահանջներ: Անհրաժեշտություն է առաջանում կրթական համակարգն ադապտացնել տվյալ կենտրոնին առանձնահատուկ պահանջներին, հետեւաբար, կարիք է լինում փոփոխություններ անել մեր համակարգում:
[[gallery3]]
Բացի այդ՝ ժամանակի պահանջներին համապատասխանելու համար պարբերաբար թարմացնում ենք մեր համակարգը, ինչպես օրինակ, համավարակի ընթացքում անհրաժեշտություն առաջացավ մշակել նոր հարթակ, որի օգնությամբ ծնողներն ինքնուրույն, առցանց կարող են գրանցել իրենց երեխային: Նախկինում գրանցման համար պարտադիր պետք էր այցելել կենտրոն:
Ժամանակ առ ժամանակ նմանատիպ նոր պահանջներ են առաջ գալիս, նոր պրոդուկտներ ստեղծելու անհրաժեշտություն է լինում, այնպես չէ, որ ունենք մեկ պրոդուկտ եւ աշխատում ենք միայն այն զարգացնելու ուղղությամբ:
Մեր պրոդուկտներից է նաեւ TUMO պորտֆոլիոն: Յուրաքանչյուր դասընթացի ավարտից հետո ուսանողներն ունենում են վերջնական արդյունք, որը նրանք կիսում են պորտֆոլիոյի միջոցով: Վերբեռնում են պորտֆոլիո եւ հանրայնորեն կիսում ցանկացած մարդու հետ: Օրինակ, երբ որեւէ ուսանողը փորձի հետագայում աշխատանք գտնել, կարող է ներկայացնել, թե ինչ աշխատանքներ է արել Թումոյում: Պորտֆոլիոյի վրա եւս մեր ինժեներների թիմն է աշխատում, որը պարբերական մշակման կարիք է ունենում:
Մյուս պրոդուկտը TUMO 360-ն է: Այն ադմինիստրատիվ համակարգ է, որն օգտագործում են աշխատողները: Դասընթացավարներն այն օգտագործում են ուսանողներին առաջադրանքներ տալու կամ տրված առաջադրանքները ստուգելու համար: Որոշ աշխատողներ TUMO 360-ն օգտագործում են մեկ տարվա համար դասընթացներ պլանավորելու համար: Մարդկային ռեսուրսների կառավարման մասնագետն (HR) օգտագործում է այդ պլատֆորմը` աշխատողներին գրանցելու կամ ուսանողների հաշիվները բացելու համար:
Ծրագրավորողների թիմի մշակած պրոդուկտներից է նաեւ կրթական բովանդակության կառավարման համակարգը՝ CMS-ը, որի միջոցով վարժանքների կրթական բովանդակությունն է ստեղծվում:
Թիմը մեծացնելու անհրաժեշտությունը
Մեր ծրագրային ապահովման թիմն այսօր շուրջ 15 հոգուց է բաղկացած, բայց պլանավորում ենք կրկնապատկել աշխատակիցների թիվը:
Թումոն մտադիր է աշխարհի տարբեր քաղաքներում բացվող կենտրոնների թիվն ավելացնել եւ կրթական համակարգը պարբերաբար փոփոխվելու, թարմացնելու, ավելի լավը դառնալու անհրաժեշտություն կունենա:
[[gallery4]]
Փարիզի, Լիոնի, Բեռլինի, Մոսկվայի, Կիեւի կենտրոնների շարքում շուտով կավելանա նաեւ Լոս Անջելեսի կենտրոնը, որը եւս իր հետ կբերի նոր պահանջներ, որոնք ապահովելու համար թիմը նոր մասնագետներով համալրելու անհրաժեշտություն կառաջանա:
Ներկայում փնտրում ենք back end եւ front end software engineer-ների, դիզայներների, QA մասնագետների: Ծրագրային ապահովման, սպասարկման բոլոր մասնագետները կարող են համալրել մեր software engineering-ի թիմը:
Թումոյի ծրագրավորողների թիմին միանալ ցանկացողների համար հարցազրույց կազմակերպելու մեր տարբերակն ունենք: Փորձում ենք մեզ դիմած թեկնածուին առնվազն չորս ժամ ներգրավել մեր թիմի աշխատանքի մեջ, որպեսզի տեսնի՝ ինչպես է անցնում օրը Թումոյում, շփվի մյուս աշխատողների հետ, որի արդյունքում ինքն էլ կհասկանա՝ ուզո՞ւմ է աշխատել այստեղ, թե՞ ոչ: Փորձում ենք ոչ միայն բացահայտել աշխատողի մասնագիտական որակները, այլեւ փոխանցել նրան եւ մեր սպասելիքները, եւ մեր աշխատաոճը:
Արփի Ջիլավյան
Լուսանկարները՝ Էմին Արիստակեսյանի